De höchschti Punkt vom Lindeberg heisst Horbe ond ned Spitz,

wo s’Rindveeh sorgt für Alpeluft am alte Chloschtersitz.

Es Reschterant für höchschte Gnuss – d’Kapälle näbedra,

stoht s’Schloss mit Riss ond alterschwach – wett neui Bsitzer ha.

 

Für Schlossherr of em Horbe d’sii, brucht’s meh als nur chli Gäld.

Wenn’s Tor ufgoht ond ine chunsch, bisch in’re and’re Wält.

Mit Molerei vom Chaschper Wolf ond Stuckatur us Gips,

müend’s Chäuffer sii mit Kunschtverschtand ond nid nur Pokerchips.

 

De Kunschtverschtand, de hämmer halt – lueg eusi Gwänder aa!

Im Häxebruef muesch kreativ mit Farb ond Stoff umgah.

Händ mer denn d’Herrschaft uf dem Schloss, wird glachet häxefräch.

De Hofnarr isch für’s luschtig sii – s’herrscht nur no Glück, kei Päch.

 

Wenn d’Häxe hocked uf em Thron, wird’s mystisch Tag ond Nacht.

Mit Zauberei wird restauriert – viel Prunk zeigt eusi Macht.

Sett eus de da no zwenig sii, gönd mer au no of d’Pirsch,

ond schiessed eus im Horbewald es grosses Gweih vom Hirsch.

 

Jo „Hirsch“ händ ihr goldrichtig ghört, bi eus isch s’Wild au rot,

das isch zwar erscht sit chorzer Zyt im Jagdschiinagebot.

Als Könige vom Horbeschloss loht eus das gar ned chalt.

«Des Waldes König» seit mer ihm – de Adel trifft sich halt.

 

Doch Achtung liäbi Jägerslüüt, wenn ihr am Luure sind,

nid jedes Hörnli, wo’n ihr gesehnd, treit s’Rehli of em Grind.

Vom Horbe suuset viel is Tal, ned nume wildi Tier.

S’git Beiker uf em Super-Trail, wo dri gönd wi ne Stier.

  

Wo frühner Slalom toll gsii isch, of Schlitte ond of Schii,

git’s Schanze, Kurve, Hindernis – s’herrscht Downhill-Euphorie.

Zum Abecho goht’s cheibe ring, s’brucht Fahrt ond e chli Muet.

Zum Uecho – denkt de Beik-Pilot – wär so ne Schiilift guet.

 

Jä no, wenn’t jetz scho z’Wittel bisch, chasch Freud am Bremse ha,

gsesch eine cho, wo chonnt vo Rächts, bisch du dä, wo bliebt stoh.

Öb Rächtsvortritt scho gnue cha sii, bi so viel Dorfverchehr?

Für d’Kasse vo de Gemeind wär guet, e Strossezollgebühr.

 

Nur Stürinahme langid ned, s’darf öppis sii dezue,

will d’Deponie jetz ufgföllt isch, wird gsuecht e neui Chueh,

wo sech au so gern mälche loht für ganz e lange Zyt.

Mer gsehd, öb’s Windrad of em Bärg die einzig Lösig bliibt.

 

Ond Chöschte git’s au i de Gmeind, d’Verwaltung spart, wo’s goht.

De Poschtversand vo Rechnige bringt s’Büdsche arg i Not.

Zur Hilf chasch du e Gönner sii ond mälde für Empfang,

en Inbox für E-Mail statt Brief als Gratis-Poschtigang.

 

Wiä wär’s wenn d’Füürwehr au no würd’ verdiene näbebii,

mit Schauspiel ond mit Comedie, voll mit Dramaturgie.

Im Oktober, wenn d’Hauptüebig fett im Kalender stoht,

chönnt mänge, wo Theater spielt, go luege, wiä das goht.

 

Guet inszeniere isch modern, erscht rächt bim Fotograf.

Was Bundesröt ganz bsonders chönd – sie zeiged sich ganz brav.

Au s’Gmeindrotsfoti – online z’gseh – isch ganz wit vor debii,

gäbt’s Wettbewerb fürs Bhördebild, s’müsst glatt de Sieger sii.

 

Go luege chamer z’Basel denn de Euro Song Contescht.

Dank Nemo wird de Wettbewerb zum grosse Schwiizer Fäscht.

Wär eusi Doppelhalle scho barat ond fertig bout,

chönnt d’Wält im Mai am Fernseh gseh, was Beuel sich zuetrout.

  

Zur Freud isch au de Chileturm so strahlend useputzt,

doch leider wird das Heiligtum fortlaufend schwächer gnutzt.

Will Pfarrer nid de Traumbruef isch vom junge Ma vo hüt,

em Agebot a Gottesdienscht droht schliechends Defizit.

 

Mer Häxe wüssid cheibe vell ond sind do druf au Stolz,

Vell onderwägs mit Schuss dur d’Luft uf Bäse ganz us Holz.

Verzelle chönnt mer scho no meh, doch würd’s denn öppe z’lang.

Mer dankid, dass ihr do sind hüt ond machid mit bim Gsang.

​