Mer Häxe chönd au Beily sii, das isch jo gar ned schwer.

Schtatt Bäseritt uf langem Schtiel, schtönd d’Flügel hinde quer.

De Zauber cha ganz besonders sii, wenn euse Schtachel trifft.

Doch händ kei Angscht – s’isch Medizin ond gar ned öppe Gift.

 

Jo, Angscht, diä chönnt mer wörkli ha, wenn d’Luftpiratin chond.

Es Hornussi ganz bös ond vom asiatische Bund.

Es jagt eus – macht eus s’Läbe schwer ond drom mues öppis go!

Dass d’Blüete ned befruchtet sind, das chömmer ned zuloh.

 

Drum hälfid, woner nome chönd, händ eui Auge off!

Met dere frömde dunkle Art wänd mer de gwöss kei Zoff.

Wer plötzli gsehd es gruusigs Näscht, de lot de PC aa:

«Asiatischehornisse» – am Schluss mit Punkt CH.

 

De Luftruum of em Horbe hät för eus e bsondri Chraft.

Ond s’Wasser, wo im Hügel flüsst, isch euse Läbessaft.

Ob Himmelsdrüklang, Schtromblueme – chasch treye, wiä’d es will’sch,

Das «Neii» vom Volk isch chräftig gsii, e B’schloss, wo’d akzeptiersch.

 

De Schtrom söll grüen ond grüener sii, doch s’Windrad isch e Fluech,

denn setzt mer halt of Sonnechraft ond schtellt zom Bou es Gsuech.

Mer riibt sich d’Auge – glaubt’s fascht ned, vo Aarau chond es «NeiN».

Ä PV-Aalag bricht ond schtört d’Dachlandschaft ongemein.

 

Das Dorf regiere, isch ned liecht, darfsch ned os Zucker sii,

ned all’s, was onlein poustet wird, gohd spurlos grad verbii.

So plötzli sind vo foif no drü – mer schtotzt – ond ohalätz.

Mer suechid Gmeindröt – Ma wiä Frau – zom Bsetze vo zwe Plätz.

 

Das Kollektiv am Gmeindrotstisch macht ganz e gute Job!

Dass d’Mehrzwäckhalle allne passt, ganz gnau ond ned nur grob.

Vo allne wärdid d’Wünsch umgsetzt, diä Lösig öberzüügt.

Applaus ond Lob isch aabrocht jetz, denn soscht wird immer grüügt.

 

Für schtraffi Adminischtration sorgt Fröndlechkeit als Frau.

Als Schriiberin för eusi Gmeind könnt sie das Dorf genau.

Mer froiid eus, dass’ öper isch, wo gwachse isch im Ort.

Zor Langziitschtell ganz gwöss verhilft «Reschpäkt» als Zauberwort.

 

Keis Chrippeschpiel am Wiehnachtsfäscht, das tuet eus scho chli weh,

es fehlt de Glanz, de Chindergsang, es Jöh ond no vell meh.

Drum sueched mer es Team mit Schwong, mit Herz ond mit Bedacht!

Wer hilft mit, dass zur Wiehnachtsziit s’Wonder wieder erwacht?

 

Keis Wonder oder – ebe doch – es Wonder, wo sich zeigt.

De Titel vom Theater meint Sankt Burkets Heiligkeit.

Es OK isch scho fliessig dra, de Reschissöhr parat.

Doch wer füllt d’Rolle vo dem Schpiel mit möglichscht viel Karat?

 

By eus, do git’s e breiti Schtross – s’bruucht Platz för grossi Gfährt.

För d’Nahrigsmittelproduktion wird au im Dorf verchehrt.

Dass Mähdröscher ond Poschtauto chönd krüüze ohni Zwang.

Bruucht’s Angaschment för d’Ka-Drü-Föfzg ond ned nur Lobesgsang.

 

Scho 19-hondert-21 händ d’Fraue z’Beuel gseh,

für Gselligkeit ond Dorfkultur muess immer öppis gscheh.

Verein chönd nome wertvoll sii, wenn öpper leitet s’Gschick.

Wenn niemer wott im Vorschtand sii, denn bricht’s dem Klub grad s’Gnick.

 

Im Rössli hät’s e Wächsel gäh, de Choch isch jetz au Wirt.

Au z’Muri hat de Tschulio sich «buono» scho bewährt.

Schtatt «Gnüsserei zom Rössli» - «Osteria Cavallo».

Dass’ ganz lang galoppiere cha, muesch fliessig inegoh.

 

S’Quartier, wo Chriesimatte heisst, wachst wiiter vor sich hee.

I Plaanig schtoht bereits Hof Drü – häsch d’Bouprofil au gseh?

E flotti Aazahl Wohnige wird’s bald zom Chaufe gäh.

Wenn d’Priise wiiter obsi gönd, bruuchsch Gäld – muesch s’Letschte näh.

 

Mer Häxe wüssid cheibe vell ond sind do druf au Stolz,

Vell onderwägs mit Schuss dur d’Luft uf Bäse ganz us Holz.

Verzelle chönnt mer scho no meh, doch würd’s denn öppe z’lang.

Mer dankid, dass ihr do sind hüt ond machid mit bim Gsang.

​